Ginarespeto sang Commander sang 303rd Infantry Brigade ang grupo nga nagakondenar sa paggamit sang armas sang militar batok sa mga katapo sang New People’s Army sa banwa sang Toboso, Negros Occidental, apang hangkat sini nga magpanaog sila kag hibaluon ang matuod nga sitwasyon.
Madumduman nga nagpagwa sang statement ang Office of the Student Regent sang University of the Philippines nga nagakondenar sa gintawag nila nga strafing operation kag human rights violations sang 79th Infantry Battalion.
Nahibaluan nga 19 ka NPA members ang napatay kalakip na si Roger Fabillar alyas Arnel Tapang nga commanding officer sang North Negros Front kay may patong sa ulo nga P1 million.
Nagpagwa man sang statement ang Student Council sang UP Diliman University nga nagtawag naman sa militar nga mga “berdugo.”
Suno kay Brig Gen Ted Dumosmog, ginarespeto nila ang personal nga panulok sa nasambit nga grupo nga yara lamang sa ila nga mga kwarto kag opisina. Apang panawagan sini nga magpanaog man kag hibaluon ang matuod nga sitwasyon sa banwa sang Toboso.
Panindugan ni Dumosmog nga ang
mga nagapamatok sa lehitimo nga operasyon sang militar nga gikan pa sa Cebu kag Manila, ang wala nakahibalo sang reyalidad.
Gani agud mahibaluan kun may
kamatuoran ang alegasyon sang human rights violations, hangkat sini nga sila ang magpanaog kag personal nga mag-imbestigar.
Pahanumdom sini nga ang NPA amo
ang nagabayolar sa tawhanon nga
kinamatarong bangod sa pagpamatay sa inosente nga mga mangunguma
kag sibilyan.
Nahibaluan nga nagdangat na sa 36 ka mga kaso sang pagpamatay ang gin-ako sang NPA nga sila ang may kahimuan sa Northern Negros, apang wala pa matumod kun pila sa nasambit nga kaso ang hinimuan sang grupo ni Tapang.
Panindugan sini nga indi na gusto ang
mga pumuluyo sang kagamo, kag ginapanawagan na ang kalinongan.
Source: Bombo Radyo Bacolod