Ginserbehan sang warrant of arrest ang lima ka ginapatihan katapo sang New People’s Army nga ginabug-usan sang isa ka babayi kag apat ka mga lalaki nga nadakpan sa Barangay Matab-ang, Talisay City, kagab-i, Abril 22.
Ginkilala ang mga nadakpan nga sanday Glemmar Ruelis Bacusmo, 48 anyos, residente sang Purok Golden Shower, Brgy. Poblacion, Ipil, Zamboanga Sibugay; Danny Boy Pacheco, 34 anyos, residente sang Sitio Buli, Brgy. Bagonbon, San Carlos City, Negros Occidental; Judy Manayon Caramihan, 34 anyos, residente sang Brgy. Santa Rosa, Murcia, Negros Occidental; Julie Ann Balora, 26 anyos, residente sang Brgy. Santa Rosa, Murcia, Negros Occidental; kag si Jerome Escamrosa Seballos, 57 anyos; residente sang Brgy. Bata, Bacolod City, Negros Occidental.
Ang mga nadakpan ang nakuhaan sang short firearms kag ang isa diri ang may pinalian sang igo sang bala sa tangkugo.
Aminado ang isa diri nga ang pilas sa
iya tangkugo ang naigo-an sang bala sang natabo ang encounter sa banwa
sang Toboso.
Apang, ginpanginwala man sini nga sila ang mga miyembro sang NPA.
Suno diri, sila lima ang magbarkadahay lamang kag natiempohan nga yara sila sa lugar kun diin nagluntad ang engkwentro sang tinalikdan nga Abril 19.
Lima ka operating units ang nagpatigayon sang joint operation lakip ang Regional Intelligence Division (RID), Police Regional Office -Negros Island Region (PRO-NIR), Criminal Investigation and Detection Group (CIDG), Regional Intelligence Unit (RIU), Regional Mobile Force Battalion (RMFB), Special Action Force (SAF), Provincial Intelligence Unit sang Negros Occidental Police Provincial Office (PIU NOCPPO), kag Talisay City Police Station.
Source: Bombo Radyo Bacolod