Padayon nga ginapakita sang Philippine National Police ang matuod nga diwa sang malasakit kag serbisyo publiko pinaagi sa malampuson nga pagpatigayon sang Silay Component City Police Station sang isa ka makabuluhan nga Medical/Surgical Mission and Outreach Program sa Sitio Mambag-id, Brgy. Balaring, Silay City.
Sa pagpanguna ni PLTCOL EDISON N. GARCIA, Chief of Police, kaupod ang Advisory Group for Police Transformation and Development, nag-isa ang nagkalainlain nga sektor sang gobyerno, pribado nga organisasyon, kag mga volunteer agud madala ang libre nga medical consultation, surgical services, bulong, kag iban pa nga kinahanglanon nga bulig para sa mga residente sang komunidad.
Nangin posible kag malampuson ang aktibidad pinaagi sa buligay sang Silay City LGU sa pagpanguna ni HON. JOEDITH C. GALLEGO, Silay City Primary Care Facility, Kanlaon Lodge No. 64 F & A M, 1st NOCPMFC, Felix G. Yusay Foundation Inc., Team Binuligay Silay, Team Manta, I3S, Celest, L&T, kag sang mga volunteer doctors nga sanday Dr. Gian Kevin Ladines, Dr. Victoria Basiao-Mirar, kag Dr. Vanessa Mahrie Madayag.
Kabahin sang pangunahing katuyuan sang sini nga programa ang pagdala sang nagakaigo nga serbisyo panglawas sa mga katawhan labi na sa mga komunidad nga limitado ang akses sa medical services.
Nagapakita man ini nga ang kapulisan wala lamang nagaserbisyo para mapadayon ang kalinong kag katawhayan, kundi may daku man nga kabalaka kag pagpalangga sa kaayuhan kag kahimsugan sang katawhan.
Pinaagi sa sini nga mga outreach activities, padayon nga ginapalig-on sang PNP ang maayo nga relasyon sa komunidad kag ang espiritu sang bayanihan, pagbinuligay, kag paghangup sa isigkatawo bilang pundasyon sang isa ka malinong kag mas mauswagon nga katilingban.
Ang ini nga makahulugan nga buluhaton isa ka pamatuod nga ang kapulisan indi lamang tigpatuman sang kasuguan kundi matuod man nga katuwang sang katawhan sa paghatag sang paglaum kag serbisyo nga mabatyagan gid sang publiko.
Kaangot sini, padayon nga ginapasanyog sang PNP ang ila adbokasiya nga “Bagong PNP para sa Bagong Pilipinas: Serbisyong Mabilis, Tapat, at Nararamdaman,” bilang simbolo sang ila dedikasyon sa matuod, madasig, kag may kasingkasing nga serbisyo publiko para sa tanan.