Patay ang isa ka ang police non-commissioned officer sang Police Regional Office Negros Island Region (PRO NIR) kag pilason man ang duha pa ka police personnel matapos magbato ang subject person sa drug buybust operation sa Sitio Talaptap, Brgy Talaptap, La Castellana, Negros Occidental kagab-i.
Napatay sa operasyon si Police Master Sergeant Devy Carampatana, personnel sang Station Drug Enforcement Team (SDET) sang La Castellana Municipal Police Station; samtang pilason naman ang Deputy Chief of Police nga si Police Captain Michael Muñez; kag Police Corporal Gerson Guache.
Ang subject person ang ginkilala nga si Edward Acupan, 41 anyos, Street Level Individual; samtang gin-aresto man ang iloy sini nga si Delia Acupan, 68 anyos, matapos mag-intra sa pag-atake.
Suno diri, samtang gina-implementar ang pag-aresto, nagbato si Edward kag gin-atake ang operatiba gamit ang double-bladed weapon, samtang nagbulig man sa pagpamuno ang iloy.
Si Carampatana ang ginhingagaw pa dala sa La Castellana Rural Health Unit, apang gindeklarar nga dead on arrival bangod sa iya samad nga naangkon tuga sang pagpamuno.
Si Muñez ang nag-agom naman sang multiple stab wounds, kag si Gauche ang naka-angkon sang minor injuries.
Si Edward Acupan, ang primary suspect, ang nag-agom man sang samad kag sa karun yara sa police custody sa La Castellana Rural Health Unit.
Gin-aresto naman si Delia Acupan, nga natalana nga pasakaan sang nagakaigo nga criminal charges.
Narecober sa operasyon ang pila ka sachet sang suspected shabu nga ginabanta nagabalor sang P47,600, buybust money, drug paraphernalia, kag ang patalom nga gingamit sa pag-atake.
Sa mensahe ni PRO-NIR Acting Regional Director Police Brig Gen Romano Cardiño, sila ang nagasimpatya sa nalisdan nga pamilya, bangod sa pagsakripisyo ni Carampatana sang iya kabuhi para sa serbisyo.
Ginakabig sini ang nagtaliwan nga pulis nga isa ka baganihan, kag pasalig sini nga indi malipatan sang kaisog kag dedikasyon sini sa pagserbe sa mga pumuluyo.
Nagpasalig man ini sang bulig kag suporta sa pamilya sang napatay kag nasamaran nga mga pulis.
Pahanumdom ni Cardinio sa mga police personnel nga maghalong sa pagpatigayon sang police operations, partikular na sa mga high-risk anti-criminality kag anti-illegal drug operations.
Source: Bombo Radyo Bacolod