Nagpahigayon og symposium ang Cebu City Police Office (CCPO) kabahin sa hustong pagdumala sa mga insidente sama sa pagpamusil ug bomb threat kagahapong adlawa, Agosto 26, 2026, sa University of San Carlos–Talamban Campus sa Barangay Talamban, Cebu City.
Gitambongan kini sa mga faculty ug staff sa eskwelahan aron mapalambo ang ilang kahibalo ug kaandam kung adunay mahitabo nga insidente nga mahimong hulga sa kaluwasan sa mga estudyante ug personnel.
Gipahinumdoman ang mga partisipante sa pag-ila sa posibleng hulga, pagsunod sa emergency protocols, hustong pag-evacuate, ug daling pagreport sa insidente ngadto sa mga awtoridad. Gihatagan usab og gibug-aton ang pagpabiling kalmado ug pagsunod sa instruksyon sa mga responders.
Gipasiugda usab ang importante nga koordinasyon tali sa eskwelahan, kapulisan ug ubang ahensya aron mas paspas ug organisado ang pagtubag sa mga emergency sama sa bomb threat ug active shooting.
Matud sa CCPO, ubos sa pagpangulo ni Acting City Director PCOL Ricky C. Sumalde, padayon nilang palig-onon ang pakigtambayayong sa mga eskwelahan aron maprotektahan ang mga estudyante, magtutudlo ug kawani ug masiguro ang mas luwas nga palibot sa pagkat-on.
Source: RPN DYKC Cebu