Patay an driver han usa nga motorsiklo samtang tulo nga iba pa an samaran ha nahitabo nga head-on collision ha National Road Brgy. San Ricardo, Babatngon, Leyte, alas-11 han gab-i, Agosto 30, 2026.
An namatay nga driver ginkilala ha alyas “Owing,” 53 anyos, parag-uma ngan residente han Babatngon, Leyte. Angkas niya ha motorsiklo hi alyas “May-may,” 50 anyos, ngan residente gihapon han Babatngon.
Samtang, an ginkabunguay hini nga mini van in ginmamanehoan ni ni alyas “Geloy,” 25 anyos, waray asawa ngan residente han Tacloban City. Sakay naman hini niya hi alyas “Lyn,” 49 anyos ngan residente gihapon han Tacloban City.
Subay ha inisyal nga imbestigasyon han Babatngon MPS, nagbibiyahe an mini van ngan an motorsiklo ha magkatugbang nga direksyon.
Tikang ha Babatngon tipakadto ha Tacloban City an mini van, samtang tipakadto ha Babatngon tikang ha Tacloban City an motorsiklo.
Pag-abot ha lugar han insidente, aksidente nga nahingadto ha kalingit nga linya an motorsiklo ngan bumangga ha mini van.
Tungod han impact, dead on the spot an driver han motorsiklo ngan gindeklara nga patay ni Dr. Julieta C. Conge, Municipal Health Officer han Babatngon.
Samtang, nagantos hin grabe nga kasamdan an back rider han motorsiklo ngan gindara ha Eastern Visayas Medical Center para han kadagmitan nga pagtambal.
Samaran gihap an driver ngan pasahero han mini van ngan gindara gihap ha EVMC para hin medikal nga atensyon.
Gindara naman ha Babatngon MPS an duha nga sarakyan nga nahidabi ha aksidente para han dokumentasyon ngan safe keeping.
Source: RMN Tacloban