Nominado ang isa ka Capiznon bilang isa sa Top 10 nominees sang Dakilang Manggagawang Pilipino sa UAE 2026 halin sa masobra 200 ka mga nominado.
Suno kay Klenton Sibelina, tumandok sang Panay, Capiz, tuman gid ang kalipay nga iya nabatyagan sang malakip ang iya nga pangalan sa mga nominado.
Dugang pa ni Sibelina, daku na nga pagpasalamat sang ini ang malakip sa Top 20, apang kaangay may plano ang Ginoo kun ngaman nangin kabahin pa ang iya pangalan sa Top 10.
Antes mangin isa ka lider sa edukasyon, nag-umpisa si Sibelina bilang waiter kag sales assistant sang una siya nag-abroad siyam ka tuig na ang nakaligad, kag wala niya ginbayaan ang iya handum nga mangin manunudlo.
Nagtudlo siya sa The Philippine School, GEMS Education kag Aldar School, kag nakabaton sang Principal’s Award, ang pinakataas nga pagkilala sang iya eskwelahan, antes ginpromote sa iya karon nga posisyon.
Kabahin man sang iya mga naangkon ang pagkilala bilang Outstanding Filipino Educator in UAE 2025, samtang karon nagapadayon siya sa Doctorate in Educational Leadership kag nagatinguha nga makahatag sang libre nga coaching para sa LET kag mas madamo nga oportunidad para sa mga Filipino educators.
Nahibaluan nga siya man ang una nga Pilipino nga na-promote bilang Senior Leader for Teaching and Learning sa Ajyal Project sang Ministry of Education sa UAE.
Bangud sini, nagapangayo siya sang suporta sa mga Capiznon kag Pilipino samtang nagapadayon ang iya nominasyon sa Top 10 sang Dakilang Manggagawang Pilipino sa UAE 2026.
Source: Bombo Radyo Roxas