Sa tunga sang nagahingapos nga rehabilitasyon sang Bacolod Public Plaza, isa ka bag-o nga dagway sang pangabuhian ang nag-abot para sa mga katuwang sang aton tradisyon. Sang Mayo 28, 2026, ginpangunahan ni Mayor Greg Gasataya ang pagtugyan sang libre kag de-kalidad nga G-Carts sa 31 ka mga miyembro sang Bacolod City Public Vendors Association (BACPUVA).
Ang ini nga tikang indi lang paghatag sang kagamitan, kundi pagkilala sa dignidad sang mga gagmay nga negosyante. Ang kada G-Cart nga nagabalor sang ₱15,000 ginpasangkapan sang solar-powered lighting para sa mas luwas nga pagbaligya sa gab-i kag Sturdy wheels kag built-in storage para sa katinlo kag kasayon sang operasyon.
Suno kay Gloria Castillano, presidente sang BACPUVA kag naga-negosyo na sa plaza halin pa sang 1970s, ang ini nga proyekto amo ang katumanan sang ila madugay na nga handum. Kon sang una masami sila gina-tabog, subong, gintagaan sila sang espesyal nga permit kag training sa idalom sang CCLDO kag DSSD agud mas mapasaka ang kalidad sang ila produkto.
Target matapos ang bug-os nga rehabilitasyon sang plaza sa idalom sang TIEZA sa Hulyo 2026. Ini agud mangin sentro sang katahum kag komersyo ang Bacolod Public Plaza sa tion sang palaabuton nga MassKara Festival sa Oktubre.
​Paagi sa G-Carts, masiguro nga samtang nagapatahum ang aton ciudad, wala sang naga-negosyo nga mabilin sa likod.