Nagapadayon ang agresibo kag determinado nga kampanya sang Police Regional Office Negros Island Region (PRO NIR) batok sa illegal nga droga, loose firearms, illegal gambling kag iban pa nga porma sang kriminalidad, matapos makumpiskar ang kapulisan sang masobra P45 milyon nga balor sang gina-patihan shabu sa bug-os nga rehiyon sa sulod lamang sang isa ka semana.
Base sa rekord sang PRO NIR, naglab-ot sa P45,291,536 ang kabug-osan nga balor sang gina-patihan shabu nga nasakmit sa 53 ka anti-illegal drug operations nga ginpatigayon halin Mayo 18 tubtob Mayo 24. Bangud sini, madamo nga personalidad nga ginapatihan may kahilabtanan sa illegal nga druga ang nadakpan kag magaatubang sang nagakaigo nga kaso.
Samtang, 89 man ka mga wanted persons ang naaresto sa nagkalain-lain nga operasyon sang kapulisan sa bug-os nga Negros Island Region, kabahin sang padayon nga pagtinguha sang PNP nga mapabaskog ang kampanya kontra kriminalidad kag mapanabat ang mga nagalapas sa layi.
Dugang pa diri, siyam ka loose firearms ang nakumpiskar sang kapulisan, nga kabahin sang tikang sang PNP sa pagpabuhin sang insidente sang pagpamuno kag iban pa nga madulom nga krimen nga ginagamitan sang wala lisensya nga armas.
Sa pihak naman sang kampanya kontra illegal
Dugang pa diri, siyam ka loose firearms ang nakumpiskar sang kapulisan, nga kabahin sang tikang sang PNP sa pagpabuhin sang insidente sang pagpamuno kag iban pa nga madulom nga krimen nga ginagamitan sang wala lisensya nga armas.
Sa pihak naman sang kampanya kontra illegal gambling, nakasakmit ang kapulisan sang P8,365 nga kuwarta halin sa 28 ka operasyon nga ginpatigayon sa nagkalain-lain nga lugar sa rehiyon.
Suno sa PRO NIR, ang sunod-sunod nga kadalag-an sang kapulisan nagapakita lamang sang mas ginpabakod nga koordinasyon, intelligence-driven operations kag aktibo nga partisipasyon sang komunidad sa pagsuporta sa kampanya sang gobyerno kontra kriminalidad.
Ginpasiguro man sang PNP nga ang ila mga operasyon nagasandig sa “5-Focused Agenda” sang organisasyon nga nagahatag prayoridad sa law enforcement, crime prevention, community engagement, kag mas mabaskog nga police visibility para masiguro ang malinong kag hilway sa kahadlok nga komunidad.
Nagauyon man ini sa ginapadayon nga mantra sang organisasyon nga “Bagong PNP para sa Bagong Pilipinas: Serbisyong Mabilis, Tapat at Nararamdaman,” nga nagatinguha nga mapalapit ang serbisyo sang kapulisan sa katawhan pinaagi sa matuod, madasig kag episyente nga pagserbisyo publiko.
Padayon naman ang panawagan sang PRO NIR sa publiko nga magbuligay kag magkooperar sa kapulisan pinaagi sa pagreport sang mga iligal nga aktibidad agud mas mapabaskog pa ang kampanya para sa malinong, matinlo kag mas luwas nga komunidad para sa tanan.