Waray lusot ha mga otoridad an usa nga high-value target mahuman ini makuhaan hin gin aaligar shabu ha ginbuhat nga buy-bust operation ha Brgy. Balud, Calbayog City, Samar, kanina han alas 12:23 han kaagahon, Mayo 29, 2026.
Ginkilala an drug suspect nga hi alyas “Nel,” 46-anyos, residente han Calbayog City, Samar.
Ha mao nga operasyon, nakumpiskar tikang ha suspek an walo kapakete hin gin aaligar shabu, P500 nga buy-bust money, usa ka yunit hin cellphone, ngan usa ka box hin sigarilyo nga gin gamit pantago han gin aaligar droga.
Ginmarkahan naman ngan gin imbentaryo ha lugar an mga narekober nga ebidensya, ha atubangan han mga ginkikinahanglan nga testigo, subay ha mandato han balaud. Samtang, gindedeterminar pa han Regional Forensic Unit 8 an aktuwal nga timbang han narekober nga shabu.
Gin aandaman na gihapon an pagpasaka hin kaangayan nga kaso kontra ha mao nga suspek.
Source: RMN Tacloban