Nagpangatubang sang dako nga problema ang mga sugarcane farmer sa Capiz bangud sa paglapta sang Red-Striped Soft Scale Insect (RSSI) nga nagahalit sa mga pananom sang tubo.
Sa interview kay Mr. Jovelon Igdales, isa ka sugarcane farmer sa Panit-an, Capiz, iya ginpahayag nga masobra sa 20 ektarya ang iya katubohan kag halos katunga sini ang naapektuhan sang RSSI.
Bangud sini, ginabanta nga halos tunga sa milyon ka pesos ang posible nga nadula sa iya kita humalin pa sang nagligad nga tuig.
Suno kay Igdales, antes naglapta ang RSSI, masobra P1 million ang iya ginakita halin sa iya katubohan.
GSuno kay Igdales , naghatag sang bulong ang Capiz Sugar Central nga ila gin-spray sa mga tubo agud mapunggan ang paglala sang epekto sang peste.
Apang tubtob subong, wala pa sang direkta nga bulig nga nabaton ang mga sugarcane farmer halin sa gobyerno.
Nagapanwagan ini sa pagpasaka sang presyo sang kalamay agud makabawi ang mga mangunguma sa dako nga gasto sa produksyon kag sa posible nga pagkadula sang kita bangud sa RSSI.
Source: Bombo Radyo Roxas