Dungan han pag antos hin kasamdan han usa nga motorista, nagresulta gihapon hin danyos ha pira nga kabablayan ngan motorsiklo an aksidente nga pagbunggu-ay han usa nga motorsiklo ngan pick-up ha Canyoyo, Marabut, Samar, banda alas 5:30 han aga kanina, July 25, 2026.
An pick-up (Toyota Hilux), in ginmamanehuan ni alyas “Flo,” 48-anyos nga drayber hin usa nga state university, inasaw-an.
An motorsiklo liwat in ginmamanehuan ni alyas “Re,” ada ha legal nga pangidaron, ngan residente han Brgy. Osmeña, Marabut, Samar.
Nagawas ha imbestigasyon nga banda alas 5:30 han aga kanina, July 25, byahe an pick-up tikang ha Borongan City, Eastern Samar, pakadto ha Tacloban City. Samtang, byahe naman an motorsiklo pakadto ha Marabut proper.
Ha pag abot ha kurbada nga parte han kalsada ha Brgy. Canyoyo, Marabut, Samar, nahisumat nga ginkalasan an pick-up pakakita han motorsiklo, ngan bumunggo ini ha motorsiklo, hinungdan han pakabunggo liwat ha palibot hin usa nga motorcycle repair shop, nga nagresulta hin danyos ha panimalay nga pinanag-iyahan nira alyas “Win,” 58-anyos nga parapangisda, ngan alyas “Ron”, 35-anyos nga opisyal han barangay.
Nagdurot gihapon ini hin danyos ha usa nga Honda Beat nga motorsiklo ngan pira nga motorsiklo nga ginhihingayad ha mao nga shop.
Tungod han panhitabo, nag angkon hin kasamdan an drayber han motorsiklo ngan dayon gindara ha hospital para han pagtambal.
Samtang, gindara liwat an drayber han pick-up ha Marabut Municipal Police Station para han sakto nga disposisyon ngan dugang nga imbestigasyon.
Nagpabilin naman ha lugar han insidente an mga sarakyan nga dabi ha aksidente para han sakto nga dokumentasyon ngan imbestigasyon.
Gin aandam na gihapon han buhatan an pagpasaka hin kaangayan nga kaso.
Source: RMN Tacloban