Ginpalig-on pa ang kapasidad sang 509 ka Barangay Tanods sa banwa sang Barotac Viejo matapos nga madinalag-on nila nga natapos ang Tanod Capacity Enhancement Training Program nga ginpatigayon sang Iloilo Police Provincial Office (IPPO).
Personal nga nagtambong sa aktibidad si Iloilo Police Provincial Director PCOL Bayani M. Razalan, nga nagpahayag sang iya bug-os nga suporta sa padayon nga pagpauswag sang kahibalo kag kapasidad sang mga Barangay Tanods.
Suno sa Director, importante ang padayon nga paghatag sang training sa mga tanod agud mas maayo nila nga mabuligan ang kapulisan sa pag-mentinar sang kalinong kag katawhay sa komunidad.
Nagpakita man sang suporta si Barotac Viejo Mayor Bongbong Tupas, nga nagpasalig sang padayon nga pagbinuligay sang Local Government Unit kag sang Philippine National Police agud mapadayon ang mga programa para sa kalinong, katawhay, kag seguridad sa tagsa ka barangay.
Ginpasalamatan man ang Liga ng mga Barangay sang Barotac Viejo sa pagpanguna ni Liga President PB Jesus Balila kag ang 26 ka Punong Barangay bangud sang ila suporta nga nangin daku nga bulig sa pagpatigayon sang una nga batch sang Tanod Capacity Enhancement Training sa probinsya sang Iloilo.
Paagi sa sini nga training, ginapaabot nga madugangan ang kahibalo kag abilidad sang mga Barangay Tanods agud mas maayo nila nga mabuligan ang kapulisan sa pagpatuman sang mga patakaran kag sa pag-mentinar sang kalinong kag katawhay sa ila mga barangay.
Source: #K5NewsFMIloilo