Ginkumpirma sang Pavia Municipal Police Station kahapon nga adlaw, Mayo 2, nga wala sang foul play sa kamatayon sang tawo nga nasapwan nga sunog sa sulod sang Greenmeadows Subdivision sa Brgy. Ungka I, Pavia, Iloilo.
Santo ini sa naggwa nga autopsy report sang medico-legal examination.
Suno kay Pcapt. Ritz Field Presquito, hepe sang Pavia Municipal Police Station, wala sang nakita nga pilas sa lawas sang biktima magluwas lamang sa isa ka healed wound sa wala sini nga butkon.
Samtang, ginkumpirma man sang pamilya ni Frank Rois Barbasa, nga may ara sang daan na nga injury si Frank sa amo man nga area sang lawas sini.
Magluwas diri, nagsanto man ang kataason ni Frank Rois sa kataason sang bangkay nga nalakip sa ordinary identifier nga gin-gamit sang pulis samtang wala pa ang DNA test.
Ginpahayag man ni Presquito nga ang rason sang kamatayon sang indibidwal nga nasapwan sa subdivsion amo ang pagkasunog.
Gin-athag ni PCapt. Ritz Field Presquito nga naghalin anay sa gamay nga pag-umpisa ang kalayo tubtob nakalab-ot ini sa lawas sang biktima nga nasapwan nga sunog sa sulod sang subdivision sa Greenmeadows, Pavia, Iloilo.
Suno kay Presquito, ginabulubanta may distansya ini nga 5 tubtob 7 ka metro ang kalayuon halin sa lawas sang biktima.
Ginpahayag man sini nga kaangay wala nag-umpisa insigida sa eksakto nga lugar ang sunog, kundi nag-amat-amat ini nga naglapta pakadto sa kun sa diin nahamtang ang bangkay sang nasapwan.
Nahibaluan nga sa amo man nga lugar, nakit-an ang mga kagamitan nga ginapanag-iyahan ni Frank Rois Barbasa nga ginapatihan nga identity sang indibidwal nga nasunog.
Source: Bombo Radyo IloIlo