Arestado han mga otoridad an usa nga lalaki mahuman ini makuhaan hin gin aaligar shabu durante han ginbuhat nga buy-bust operation ha Brgy. Bislig, Tanauan, Leyte, dida han September 13, 2026, banda alas 7 han gab-i.
Ginkilala an suspek ha alyas nga “Epog,” 42-anyos nga parapangisda, mayada live-in partner, ngan residente han Brgy. Sacme, Tanauan, Leyte.
Ha mao nga operasyon, nakumpiskar tikang ha suspek an sumatutal tulo (3) kapakete hin gin aaligar shabu nga mayada kabug-at nga maabot ha 1.3 grams ngan nagkakantidad hin ginbabana bana P8,840, P500 nga gin gamit kumo buy-bust money, ngan usa ka itom nga kalo.
Gin markahan naman ngan gin imbentaryo an mga narekober nga ebidensya ha lugar han pag aresto, ha presensya han suspek ngan han mga gin imbitar nga testigo, ha pagsunod ha mandato han balaud.
Gintutudlok pa han Regional Forensic Unit 8 an ginbabana bana nga timbang han nakumpiskar nga gin aaligar shabu. Samtang, gin aandam na an pagpasaka hin kaangayan nga kaso kontra ha mao nga suspek.
Source: RMN Tacloban