Natagan na hin pagklaro bahin ha pangilal-an han nadiskobre nga lawas ha kadagatan han Brgy. Guintigian, Babatngon, Leyte, mahuman ini matudlok ngan makumpirma han mga otoridad nga amo gihapon nga lalaki nga nahireport nga lumayog ha San Juanico Bridge.
Ginkilala an biktima nga hi alyas “Poypoy,” 28-anyos nga scrap buyer, mayada live-in partner, ngan residente han Brgy. San Pedro, Sta. Rita, Samar.
Ha inisyal nga imbestigasyon, an patay nga lawas han biktima in nadiskobre ni alyas “Mar,” 20-anyos nga fish cage caretaker samtang pakadto ini ha iya fish cage sakay hin motorboat, nga naglulutaw lutaw hirani ha pantalan han barangay.
Dayon ini nga nangaro hin bulig tikang ha mga bystanders, nga amo naman an nag asister pagbunlot ha biktima paharani ha pantalan.
Positibo nga nakilal-an an biktima han iya live-in partner nga hi alyas “Lita” nga dayon pumakadto ha lugar.
Dugang nga nakumpirmar han mga personales han Tacloban City Police Station 3 nga an biktima in amo gihapon an nahisumat nga lalaki nga pumitik tikang ha San Juanico Bridge dida han September 13, banda alas 5 han kulop.
Source: RMN Tacloban