Kasunod han reklamo nga gindaop ha RMN Tacloban han pipira nga vendors ha Abucay Terminal, naghatag hin pahayag an New Bus Terminal management kaparte han isyu.
Sumala kan New Bus Terminal Administrative Officer Jovannie Enriquez, diri nakangaran kan Regina Sellave (tagreklamo) an stall nga iya gin-ookuparan ngan ginaaligar mayda pa ini waray kabaydi nga mga penalidad.
Gindugang pa hini nga nagdig-on hi Sellave nga napalit niya an puwesto, rason nga gin-aaghat hiya han management nga magpresentar hin opisyal nga dokumento nga magpapamatuod nga ligal nga naibalhin ha iya ngaran an stall.
2 nga nga tindahan ha nasabe nga terminal an nakatalaan pasadhan han mao nga opisina tungod han ginaaligar diri pagsunod hin sakto nga proseso han pagbalhin han pwesto.
Manunundoman nga nagtikang an reklamo han pipira nga vendors ha Abucay Terminal, lakip na hi Sellave, may kalabutan han ira ginaaligar nga diri patas nga pagpapatuman han pagsasara han pipira nga tindahan. Sumala ha iya, damo nga magtirinda an waray certificate of ownership pero an iya ngan usa pa nga tindahan la an ginpapasara.
Source: RMN Tacloban