Liwat nga nagpatigayon ang Iloilo City Police Office ukon ICPO sang inspeksyon sa tanan nga pulis nga naka-assign sa ila headquarters subong nga adlaw, Agosto 7.
Ang amo nga inspeksyon ang ginahimu kada bulan bilang kabahin sang inisyatibo nga mapabaskod ang disiplina, responsibilidad kag kahandaan sang mga pulis sa ila pagserbisyo sa publiko.
Ginpangunahan ni Police Executive Master Sergeant Rommel Nandin, City Executive Senior Police Officer ang nasambit nga inspeksyon agud masiguro nga nagasunod ang mga personnel sang husto nga pagsuksok sang uniporme, malimpyo nga pag-atipan sa kaugalingon, kag pagsunod sa mga patakaran sang Philippine National Police (PNP).
Hugot man nga ginapaathag sang ICPO nga ang disiplina kag propesyonalismo ang naga-umpisa sa pamatasan kag hitsura sang kada pulis, nga amo ang nagapakita sang kredibilidad kag integridad sang PNP.
Dugang pa, padayon ang ICPO sa pagpatuman sang mga inisyatibo nga makapabaskod sang disiplina, makahatag sang mas maayo kag mas masaligan nga serbisyo para sa mga pumuluyo sa syudad sang Iloilo.
Source: #BomboRadyoIloilo