Nagapadayon ang mabaskog nga kampanya sang Police Regional Office – Negros Island Region (PRO-NIR) kontra kriminalidad matapos marekord ang 38.89% nga pagnubo sang focus crime incidents sa bug-os nga rehiyon sang Hulyo 2026, kumpara sa amo man nga binulan sang nagligad nga tuig.
Ang nasambit nga kadalag-an nagapamatuod sang epektibo nga implementasyon sang anti-criminality programs sang PRO-NIR nga nagahatag sang mas luwas nga palibot, malinong nga komunidad, kag mas mabaskog nga pagsalig sang publiko sa Philippine National Police.
Sa datos sang PRO-NIR, ang physical injury ang may pinakadaku nga pagnubo nga 72.22%, sunod ang rape nga nagkunhod sang 71.43%, samtang ang murder kag theft nagpakita man sang padayon nga pagnubo. Sa pihak sini, nagpabilin nga kontrolado ang mga kaso sang homicide, robbery kag carnapping, bunga sang padayon nga pagpatuman sang epektibo nga police operations.
Gina-angot ang ini nga positibo nga resulta sa mas ginpabakod nga intelligence-driven operations, mas mataas nga police visibility, agresibo nga law enforcement operations, estratehiko nga deployment sang kapulisan sa mga lugar nga posible mataboan sang krimen, kag malig-on nga koordinasyon sa mga local government units, barangay officials, force multipliers, kag sa komunidad.
Suno kay PBGEN Romano V. Cardiño, Regional Director sang PRO-NIR, ang padayon nga pagnubo sang kriminalidad nagapakita sang dedikasyon sang kapulisan kag sang kooperasyon sang publiko sa pagmintinar sang kalinong kag katawhayan.
Sa mas ginpabakod nga kampanya kontra kriminalidad kag mas malapit nga pakig-updanay sa komunidad, nagapadayon ang PRO-NIR sa pagpatuman sang katuyuan nga mapreserbar ang kalinong, maprotektahan ang kabuhi kag kabtangan sang katawhan, kag mapatuman ang isa ka mas luwas, mas malinong, kag mas maayong Negros Island Region para sa tanan.