Usa nga grupo hin mga graduating engineering students in naghimo hin hybrid renewable energy system nga nagamit hin solar energy ngan hydropower tikang ha gutiay nga irrigation canal basi makapagpaandar hin mga streetlight ha usa nga farming community ha Barangay Socsocon, Pastrana, Leyte.
An energy system in nakakakuha hin 70 porsyento hin kuryente tikang ha solar energy ngan 30 porsyento tikang ha hydropower. Nakakapaghatag ini hin kuryente ha lima nga streetlights ha usa nga farm-to-market road sulod hin tubtob 10 oras kada gab-i.
An hydropower system in nagamit han sulog han tubig ha irrigation canal pinaagi hin mini-hydro turbine rasun nga diri hini nadidisturbo an panginahanglan hin tubig ha pag-uma. An solar ngan hydropower in nagpo-produce hin kabug-osan nga 235 watts nga kuryente.
An proyekto nga gintawag “Hybrid System Using Solar-Hydro for Sustainable Street Lighting” in gindisenyo ngan gihimo nira Ey-Ar Udtuhan, Aron Kyle Cabodil, Marlon Rey Caharop, ngan John Russel Geroy, nga mga estudyante han Electrical Engineering ha Eastern Visayas State University (EVSU).
Gumastos hira hin purlomenos PHP60,000 para han paghimu han energy system ngan mga streetlights antes ini opisyal nga iginturn-over ha barangay.
Sumala ha mga opisyal han barangay, dako nga bulig an proyekto kay pinaagi han streetlight, malawag ngan talwas nga makakalakat an mga tawo bisan gab-i.
Dugang pa han barangay nga may plano hira nga padakuon pa ini pinaagi han lokal nga pondo.
Nagsiring naman hi EVSU Dean of Engineering Vinyl Oquino nga an proyekto nagpapakita han tumong han liburan, nga makahimo hin praktikal nga engineering solutions nga nakakabulig ha komunidad ngan nasuporta ha climate action ngan sustainable development.