Malampuson nga nahuman ang 1st Local and Overseas Job Fair nga gipahigayon sa Alodome sa lungsod sa Aloguinsan human daghang Sugboanon ang nadawat dayon sa trabaho o “Hired-On-The-Spot” (HOTS).
Pinaagi sa panagtinabangay sa Provincial Government of Cebu, Local Government Unit (LGU) sa Aloguinsan, Public Employment Service Office (PESO), Department of Labor and Employment (DOLE), ug Department of Migrant Workers (DMW), daghang aplikante ang nabigyan og oportunidad alang sa lokal ug overseas nga trabaho.
Dako usab ang suporta ni Governor Pamela “PAM” Baricuatro sa pagdala og dugang oportunidad sa mga Sugboanon, ilabi na sa mga nanginahanglan og lig-on nga panginabuhian ug bag-ong pagsugod alang sa ilang pamilya.
Sumala sa mga organisador, tumong sa maong job fair nga madala ang oportunidad sa trabaho duol sa katawhan aron mas daghan pa ang makabenepisyo ug makabaton og maayong kaugmaon. Padayon usab nga magpahigayon og susamang kalihokan ang PESO Cebu ug PESO Aloguinsan uban sa nagkadaiyang ahensya sa gobyerno.
Samtang, dako ang pasalamat sa mga bag-ong HOTS applicants tungod sa higayon nga ilang nadawat nga mahimong sinugdanan sa mas lig-on ug mas maayong kaugmaon.