Isa ka kadalag-an nga ginapabugal sang bug-os nga Police Regional Office Negros Island Region (PRO NIR) ang pagkilala sa Dumaguete City bilang Safest City in the Philippines para sa Calendar Years 2025 kag 2026 sang World Travel Index.
Ini nga pagkilala nagapakita sang mabaskog nga pagbinuligay sang lokal nga panguluhan, kapulisan, mga stakeholder, kag mga pumuluyo sa pagpatuman sang mga programa para sa kalinong kag seguridad.
Sa idalom sang pagpanguna ni PBGEN ROMANO V CARDIÑO, Regional Director, padayon nga ginapalig-on sang PRO-NIR ang presensya sang kapulisan sa mga komunidad paagi sa regular nga police patrols, visibility operations, crime prevention initiatives, kag madasig nga pagresponde sa mga concern kag insidente. Ang mga tikang nga ini nagatuyo nga mapunggan ang krimen, mapalig-on ang seguridad, kag masiguro nga ang mga pumuluyo kag mga bisita makapuyo kag makabiyahe sa isa ka malinong kag luwas nga palibot.
Importante man sa sini nga paninguha ang padayon nga pagpakig-angot sang kapulisan sa komunidad. Paagi sa police-community partnership, ginapalapad sang Philippine National Police ang kooperasyon upod sa mga lokal nga panguluhan, pribado nga sektor, civic organizations, kag mga pumuluyo agud mas madasig nga maresolbar ang mga problema kag concern nga may kaangtanan sa kalinong kag seguridad.
Ang pagkilala sa Dumaguete City nagaserbe man nga inspirasyon sa PRO-NIR nga padayonon pa ang pagpaayo sang serbisyo publiko. Para sa kapulisan, ang isa ka luwas nga komunidad indi lamang nasukod sa kadamuon sang krimen nga napunggan, kundi sa pagsalig sang katawhan sa ila kapulisan kag sa presensya sang serbisyo nga ila mabatyagan sa tion nga ila ini kinahanglanon.
Padayon nga mangin kaabag ang Police Regional Office Negros Island Region sa pagpatukod sang mas luwas kag malinong nga mga komunidad sa bilog nga Negros Island Region.