Mas ginpakusog pa han Department of Education (DepEd) an kampanya kontra ha bullying, pangastigo, ngan pananarhog ha mga eskwelahan.
Ini in ha ilarom han DepEd Order No. 006, series of 2026 o an Guidelines on Ensuring a Safe and Motivating Learning Environment.
Ha pakig-usa han DepEd ha Philippine National Police (PNP), Department of Social Welfare and Development (DSWD), ngan mga local government unit (LGU), igpapatuman an strict Zero-Tolerance Policy kontra ha mga matalapas ha sakob man han campus o ha online.
Sumala ha DepEd, an Child Protection Committee han kada eskwelahan an mangungulo ha pag-iimbestigar ha mga insidente agud masiguro an proteksyon ngan psychosocial support para ha mga biktima.
Samtang, iginlinya gihapon an magbug-at nga sirot depende ha lebel han pagtalapas.
Para ha minor offenses, igpapatuman an reprimand, pag-abiso ha kag-anak, ngan guidance counseling nga direkta nga kakaptas han teacher.
Para liwat ha serious offenses sugad han pautro-utro nga bullying ngan online harassment:
Ha first offense, papatumanan ini hin tubtob lima ka adlaw nga suspension ngan DSWD referral.
Ha second offense, igkikinahanglan na nga bumalhin hin eskwelahan ha masunod nga school year ha ilarom han non-readmission.
Ngan ha third offense, dayon nga igpapatanggal o exclusion ngan pagbalhin ha alternative learning.
Waray naman pagpasaylo ha mga magbubuhat hin high-risk offenses sugad hang rabe nga pangastigo, bomb threat, ngan pagdara hin armas.
Non-readmission dayon ha syahan nga pagtalapas, samtang permanent exclusion ngan pormal nga pag-turnover ha mga otoridad an igdudurot han ika-duha nga pagtalapas.
Source: RMN Tacloban