Isa naman ka makabuluhan nga tikang para sa kaayuhan sang mga kabataan ang ginlunsar subong nga adlaw ika-8 sang Hunyo 2026 sang City Government of Bacolod sa pagpanguna ni Mayor Greg Gasataya pinaagi sa city-wide rollout sang school kits para sa mga estudyante sa pampubliko nga mga eskwelahan.
Sa sini nga programa, ginbisita anay sang LGU ang A.L. Jayme Elementary School, Kabugwason Elementary School, Mandalagan Elementary School, kag Abkasa Elementary School agud personal nga matugyan ang mga school supplies nga magabulig sa pagpreparar sang mga estudyante para sa nagahilapit nga pagbukas sang klase.
Ang inisyatibo nagapakita sang pagpakigbahin sang lokal nga panguluhan sa mga ginikanan kag pamilya nga nagapangabudlay agud matustusan ang edukasyon sang ila mga kabataan.
Paagi sa paghatag sang libre nga school kits, ginapaabot sang siyudad nga mapagaan ang mga gastuhon sang mga pamilya kag mapasiguro nga may kinahanglanon nga kagamitan ang tagsa ka estudyante sa pagsugod sang ila pagtuon.
Magapadayon ang distribusyon sa masunod nga mga inadlaw tubtob nga mabaton sang tanan nga pampubliko nga eskwelahan sa DepEd Bacolod City Division ang ila school supplies. Ini nga programa nagasimbulo sang pagtuo nga ang edukasyon isa sa pinakamakusog nga pundasyon sang progreso kag masanag nga palaabuton.
Sa kada bag nga ginahatag, may kaangot nga paglaum. Sa kada school kit, may mensahe sang pagpalangga kag suporta para sa kabataan. Kag sa kada estudyante nga mabuligan, nagadugang ang paglaum para sa mas mabaskog, mas edukado, kag mas mauswagon nga Bacolod.