Isa ka makapadasig nga inisyatibo ang napatigayon sa Negros Occidental High School (NOHS) sang ginpanguluhan ni Mayor Greg Gasataya ang pagpanghatag sang school bags, papel, kag ballpens sa 9,136 ka estudyante bilang kabahin sang padayon nga pagpalig-on sang edukasyon kag kaayuhan sang mga kabataan.
Ang ini nga inisyatibo indi lamang simpleng pagpanghatag sang school supplies, isi ini ka mensahe nga ang gobyerno nagakilala kag nagahatag importansya sa mga kinahanglanon sang mga estudyante, labi na sa mga kabataan nga nagakinahanglan sang dugang nga bulig agud makapadayon sa ila pag-eskwela.
Ang tagsa ka bag kag school supplies nagaserbe nga suporta sa ila adlaw-adlaw nga pagtuon kag nagahatag sang dugang nga inspirasyon nga magpadayon sa pagkab-ot sang ila mga pangandoy.
Natatakan man ini nga importante nga tikang bangod ini ang una nga tion nga ang Bacolod City Government nakapalab-ot sang amo nga programa sa NOHS, nga yara sa idalom sang Department of Education–Schools Division of Negros Occidental. Nagapakita ini nga ang serbisyo sang ciudad padayon nga nagalapta kag nagalab-ot sa mas madamo nga kabataan, ilabi na sa mga Bacolodnon learners.
Sa masobra 113,000 ka mga estudyante nga nakabenepisyo sa sini nga programa, ginapakita nga ang pag-invest sa edukasyon isa ka importante nga pamaagi sa pagtukod sang mas maayo nga palaabuton.
Ginpahayag sang alkalde ang iya commitment nga ipadayon kag pauswagon ini kada tuig agud masiguro nga wala sing Bacolodnon youth nga mapabay-an. Isa ini ka saad nga ang kabataan padayon nga mangin sentro sang mga programa nga nagahatag sang oportunidad, suporta, kag paglaum.
Para sa mga NOHSians, ang ini nga bulig isa ka pagpahanumdom nga indi sila nagaisahanon sa ila pagpaninguha. Sa likod sang tagsa ka estudyante may pamilya, mga manunudlo, kag isa ka komunidad nga nagahandom nga makita sila nga maglampos.