Malampusong gisaulog sa Barangay Sambag II Batch 1 AMUMA Group nga nailhang “Forever Young” ang ilang ika-tulo ka anibersaryo inubanan sa pay-out activity niadtong Mayo 12, 2026.
Ang maong kalihokan nagpakita sa padayon nga panaghiusa, aktibong partisipasyon, ug lig-on nga pakiglambigit sa komunidad sa mga kababayen-an nga miyembro sa barangay.
Mitambong usab ang mga representante gikan sa DILG Cebu City nga sila si LGOO II Veverly P. Gulfan ug LGOO V Jedaia B. Nepomuceno aron ipakita ang ilang suporta sa maong kalihokan. Matud nila, ang AMUMA usa sa mga nag-unang programa sa DILG Region VII nga nagtutok sa pagpalig-on sa papel sa kababayen-an ug pagpasiugda sa makahuluganon nga partisipasyon sa komunidad.
Gipadayag usab ni Punong Barangay Keith Noel T. Wenceslao ang iyang suporta ug pagpasalamat sa “Forever Young” AMUMA Group tungod sa padayon nga kalamboan ug positibong kontribusyon niini sa barangay. Iyang gipahibalo nga adunay plano nga mag-organisa og ikatulong batch sa AMUMA program aron mas daghang kababayen-an sa Barangay Sambag II ang makaapil sa nagkalain-laing community-based activities ug programa.