Natigayon na ang send-off ceremony sang mga personnel sang Negros Occidental Police Provincial Office para sa pagbantay sa selebrasyon sang 30th Panaad sa Negros Festival.
Suno pa kay NOCPPO Director Police Col. Dennis Wenceslao, ang pagbantay sang kapulisan ang ginsuguran na kahapon sa presentasyon sang Lin-ay sang Negros 2026.
Apang kaina sang aga, ginpatigayon ang opisyal nga send-off ceremony sang 852 ka kapulisan upod sa masobra 200 ka personnel gikan sa iban nga ahensya.
Kalakip diri ang mga gikan sa Bureau of Fire Protection, Philippine Coast Guard, Explosive Ordnance Disposal and Canine Unit, Force multipliers kag mga Disaster Risk Reduction and Management Councils.
Ang Panaad sa Negros Festival 2026 ang opisyal nga magabukas sa Lunes, Abril 13 tubtob na sa Abril 19.
Mangin prayoridad sa pagbantay ang festival site partikular na sa Panaad Park and Stadium.
Pasalig ni Wenceslao nga seguruhon sang mga security personnel ang kahilwayan sang mga festival goers.
Source: Bombo Radyo Bacolod