Kap-atan ug napulo ka carroza gikan sa nagkalain-laing lungsod ug siyudad sa Sugbo ang mopakita sa ilang garbo sa Halad sa Pagtuo 2026 karong Agosto 29 sa Cebu City Sports Center (CCSC).
Giorganisar sa Cebu Provincial Government, ang kalihokan nagtumong nga dad-on sa siyudad ang dato nga relihiyoso ug kultural nga tradisyon sa mga lungsod sa Sugbo pinaagi sa pagpasidungog sa ilang tagsa-tagsa ka patron pinaagi sa mga carroza.
Magsugod ang prusisyon alas 2:30 sa hapon gikan sa Cebu Provincial Capitol, moagi sa Osmeña Boulevard ug Fuente Osmeña, ug matapos sa CCSC. Wala’y foot procession o public participation, apan mahimong motan-aw ang mga interesado sa gitakdang mga sidewalk ubay sa ruta.
Pagahimoon usab ang usa ka concelebrated Holy Mass, diin adunay usa ka pari nga imbitahon gikan sa matag lungsod ug siyudad, sundan sa pagpanalangin sa tanang carroza nga ipresentar.
Adunay usab Halad nga Sayaw, o mass dancing, nga pangulohan ni Cebu Governor Pamela Baricuatro, uban sa mga pari ug mga opisyal sa provincial government.
Tulo lamang ka local government unit—Alcantara, Cordova, ug Daanbantayan—ang dili makaapil tungod sa ilang tagsa-tagsa ka town fiesta.
Kaniadto gitawag nga Pasundayag sa Pagtuo, ang kalihokan karon nagtinguha nga mahiusa ang solemnidad sa pagtuo ug malipayon nga espiritu sa mga pista sa mga lungsod sa Sugbo.
Kabahin usab sa programa ang mga pasundayag gikan sa pito ka lokal nga festival: Sinulog sa Carmen, Tuba Festival sa Borbon, Bisnok Festival sa Dumanjug, La Torta Festival sa Argao, Hinulawan Festival sa Toledo, Dagitab Festival sa Naga City, ug Kakaban Festival sa Carcar City.
Ang matag lungsod ug siyudad nga moapil gihatagan og ₱2 milyon nga subsidy alang sa transportasyon, pagkaon, ug uban pang panginahanglanon sa kalihokan.
Matod ni Provincial Tourism Office Head Rowena Montecillo, gipakusgan ang pagpangandam aron masiguro ang hapsay ug luwas nga pagdumala sa kalihokan, lakip ang koordinasyon sa seguridad ug traffic management uban sa mga traffic enforcer sa siyudad, Philippine National Police, ug Capitol Security Unit.
LIBRE ang admission, apan mga 2,000 ka lingkoranan lamang ang magamit sa publiko, nga ipanghatag base sa first-come, first-served. Ang mga tiket ipanghatag sa entrance gate sa venue sa adlaw mismo sa kalihokan.