Tulo nga ginaaligar drug personalities an nadakop ha magkahiwalay nga buy-bust operation ha Tacloban City ngan Samar han Huwebes nga gab-i, Agosto 6, diin sobra ₱400 mil nga kantidad han ginaaligar shabu an narekober.
Ha Tacloban City, nadakop hira alyas “Deo,” 46 anyos, lalaki ngan ginkilala nga High-Value Individual o HVI, ngan alyas “Iza,” 39 anyos, babayi ngan ginkilala nga Street-Level Individual o SLI. Pareho hira residente han Tacloban City.
Narekober ha operasyon an 10 nga heat-sealed transparent plastic sachet ngan usa nga knot-tied transparent plastic cellophane nga may sulod hin ginaaligar shabu nga may kabug-aton nga ginbabana-bana 60 gramos ngan gin-eestimar nga ₱408,000 an DDB value, kaupod an buy-bust money.
Samtang ha Samar, nadakop hi alyas “Pet,” 25 anyos, laborer, ginkilala nga HVI ngan residente han Catbalogan City.
Narekober ha iya an lima nga heat-sealed transparent plastic sachet nga may sulod hin ginaaligar shabu nga may kabug-aton nga ginbabana-bana 0.48 gramos ngan gin-eestimar nga kantidad nga ₱3,264, kaupod an kwarta ha iba-iba nga denominasyon ngan buy-bust money.
An ngatanan nga narekober nga ebidensya in ginmarkahan ngan gin-inventory ha lugar han operasyon ha presensya han mga ginkikinahanglan nga saksi, uyon ha balaud.
An tulo nga nadakop in aada na ha kustodiya han ira tagsa-tagsa nga arresting unit samtang gin-aandam an pormal nga mga kaso tungod ha paglapas ha Republic Act No. 9165 o Comprehensive Dangerous Drugs Act of 2002.
Source: RMN Tacloban