Nadakop na han mga otoridad an usa han mga suspek ha pan-ambush nga nahitabo ha Brgy. Salvacion, Albuera, Leyte han Hunyo 15 nga nagresulta han kamatayon han asawa han usa nga barangay chairman ngan iya bodyguard.
Ginkilala an nadakop nga suspek ha alyas nga “Totoy,” 27 anyos ngan residente han Albuera, Leyte. Samtang, nakilala na liwat han kapulisan an iya kaupod nga hi alyas “Berto,” residente gihapon han nasabi nga bungto, pero padayon pa nga ginhahalpat han mga otoridad.
Subay ha Police Regional Office 8 (PRO-8), nadakop an suspek pinaagi han hot pursuit operation nga ginpangunahan han Regional Task Force (RTF) Kamurayaw kaupod an Albuera Municipal Police Station, Provincial Intelligence Unit, 1st Leyte Provincial Mobile Force Company ngan an LGU Albuera.
Narekober liwat han mga operatiba an usa nga 7.62mm M14 Springfield Armory rifle nga may unom nga live ammunition, ngan usa nga R4 rifle nga may usa nga magazine ngan 25 nga 5.56mm live ammunition.
Subay kan PRO-8 Regional Director PBGen. Jason L. Capoy, padayon an ira operasyon para madakop an usa pa nga suspek ngan masiguro nga manbabaton an ngatanan nga may kalabotan ha krimen.
Yana, aada na ha kustodiya han Albuera Municipal Police Station an nadakop nga suspek samtang padayon an follow-up operation han kapulisan para ha pagdakop han usa pa nga suspek.
Padayon pa yana an mas hul-os nga imbestigasyon agud hisabtan an motibo han krimen.
Source: RMN Tacloban