Dara han patong patong nga kaso nga may kalabutan ha Rape ngan Acts of Lasciviousness, malinampuson nga naaresto han mga otoridad an usa nga lalaki nga gintudlok kumo Top 1 Most Wanted Person ha bug-os nga probinsya han Leyte, ha gindumara nga manhunt operations ha Brgy. Poblacion, Tabango, Leyte, kakulop, July 14, 2026.
Ginkilala an akusado ha alyas nga “Armand,” 36-anyos nga laborer, ngan residente han Brgy. Poblacion, Tabango, Leyte. Hiya in naaresto pinaagi han unom (6) nga warrant of arrest nga petsado July 9, 2026, nga ginpalusad han Acting Presiding Judge han Regional Trial Court, Branch 17, Palompon, Leyte.
Yana, nag-aatubang an mao nga akusado hin usa nga kaso hin Rape, upat ka kaso hin Rape by Sexual Assault, ngan usa ka kaso hin of Acts of Lasciviousness, tanan in may kalabutan ha Section 5(b) of Republic Act No. 7610 (Special Protection of Children Against Abuse, Exploitation and Discrimination Act).
Waray naman ginrekomenda nga pyansa para han tanan nga reklamo hin Rape, samtang mayada nakatalaan nga P10,000 nga pyansa para han kada kaso hin Rape by Sexual Assault, ngan P10,000 para han kaso nga Acts of Lasciviousness.
Ginpasabot liwat ha akusado an kina-iya ngan hinungdan han iya pakaaresto, sugad man han iya mga konstitusyonal nga katungod ha yinaknan nga iya hul-os nasasabtan antis gindara ha Tabango Municipal Police Station para han dokumentasyon ngan sakto nga disposisyon san-o maturnover ha court of origin.
Source: RMN Tacloban