Opisyal nang idineklara ng Sangguniang Panlungsod ng Tacloban na nasa ilalim ng state of emergency ang lungsod nito lamang Mayo 29, 2025, kasunod ng limitadong akses sa San Juanico Bridge.
Layunin ng deklarasyong ito na mapabilis ang pagtugon, mabilis na mailaan ang mga kinakailangang rekurso, at masigurado ang kaligtasan ng publiko—lalo na’t ang San Juanico Bridge ay nagsisilbing pangunahing daanan para sa mga kalakal, suplay medikal, at biyahe sa pagitan ng Leyte at Samar.
Alinsunod sa Seksyon 16 ng Local Government Code at mga pambansang disaster protocol, maaaring magdeklara ng state of emergency kung nanganganib ang kaligtasan ng publiko o kung kailangan ng agarang aksyon sa harap ng krisis o pagkaantala ng mahahalagang serbisyo.
Dahil sa limitadong pagdaan sa San Juanico Bridge—na pangunahing lagusan papasok at palabas ng Tacloban—nababahala ang lungsod sa epekto nito sa takbo ng ekonomiya, kakayahang tumugon sa mga emerhensiya, at pagkaantala sa supply chain.
Sa pamamagitan ng deklarasyong ito, pinahihintulutan ang lokal na pamahalaan na kumilos nang mas mabilis, maglaan ng pondo para sa emerhensiya, at makipag-ugnayan sa mga pambansang ahensya para sa karagdagang suporta.
Panulat ni Cami
Source: RMN Tacloban – #RMNTaclobanNews: TACLOBAN CITY,… | Facebook