Ginapasidunggan sang Police Regional Office Negros Island Region (PRO-NIR) ang kabayanihan ni Police Master Sergeant (PMSg) Fernando P. Marfa, nga napatay samtang nagapaninguha sa pagluwas sang duha ka persona nga nadalahig sang mabaskog nga sulog sa isa ka seaborne patrol sa Sitio Bisang, Barangay Luna, Cadiz City, sang Agosto 7, 2026.
Suno sa inisyal nga imbestigasyon, pasado alas-10:30 sang aga, si PMSg Marfa, nga naka-assign sa Cadiz Component City Police Station, kaupod ang mga katapo sang Bantay Dagat, nagpatigayon sang seaborne patrol. Samtang nagalatas sang suba, duha sa iya mga kaupod ang gindala sang mabaskog nga agos kag nameligro nga malumos.
Wala nagduhaduha si PMSg Marfa kag gilayon nga nagresponde agud luwason ang duha. Apang samtang nagahatag sang bulig, siya mismo ang nalumos bangod sa mabaskog nga sulog.
Gilunsar dayon ang search and retrieval operation sang mga personnel sang Cadiz Component City Police Station kag CDRRMO, kag narekober ang iya lawas kag gindala sa Cadiz District Hospital. Bisan pa sa tanan nga panikasog, gin-deklarar siya nga dead on arrival bangod sa Asphyxia by Drowning.
Sa iya katapusan nga tikang, ginpamatud-an ni PMSg Marfa ang matuod nga kahulugan sang “Serbisyo Para sa Katawhan.” Iya gin-atubang ang peligro kag gin-una ang kabuhi sang iban antes ang iya kaugalingon isa ka sakripisyo nga nagapakita sang kaisog, malasakit, kag dedikasyon sang isa ka tinuod nga manug-alagad sang katawhan.
Ginpaabot sang PRO-NIR ang ila pakigbahin sa kasulub-an sang pamilya ni PMSg Marfa. Ginpasidunggan man ni Regional Director PBGEN Romano V. Cardiño ang iya sakripisyo, nga naglaragway sa iya bilang isa ka dedikado nga police officer, maisog nga public servant, kag bayani nga nagpili sang pagluwas sang iban bisan pa sa risgo sa iya kaugalingon nga kabuhi.
Ang ehemplo ni PMSg Marfa magapabilin nga inspirasyon sa mga pulis nga padayon nga nagapanumpa sa pagprotektar sang kabuhi kag pagserbisyo sa katawhan bisan sa tunga sang peligro.