Nagapadayon ang hot pursuit operation sang San Rafael Police batok sa 20-anyos nga preso nga nakapalagyo sa Brgy. Aripdip pasado las-4 kahapon sang hapon.
Sa interview kay Police Lieutenant Francis Carona, Officer-in-Charge sang San Rafael Municipal Police Station, naglisensya nga mangihi ang preso nga si Gerald Palma Gimena, Jr.
Nakaposas (atubang) ang duha nga kamot sang preso. Sang nakapanaog na sa salakyan, naglumpat siya sa banglid.
Duha ka police ang nag escort sa preso kahapon.
Ginlagas siya sang kapulisan apang wala na maabutan. Posible nga ginplano sang preso ang pagpalagyo kag saulado niya ang dalan, suno kay Carona.
Ginpasakaan sang kaso nga rape ang preso kahapon kag pabalik na kuntani sa San Rafael MPS sang nagpalagyo.
Source: #DYRPLifeRadioIloilo