Gin turn over han Department of Agriculture (DA) an PhP50-milyon nga Rice Processing Center (RPC) ngadto ha Cuta Multipurpose Cooperative ha Barangay Pikas, Barugo, Leyte agud mapauswag ngan mapaupay an pagproseso hin humay ngan madugangan an kita han mga parag-uma.
Ginponduhan rice processing center pinaagi han National Rice Program.
An RPC may-ada six-ton-per-batch mechanical dryer ngan rice mill nga may kapasidad nga makapagproseso hin 1.8 tonelada kada oras. May-ada liwat ini building nga gagamiton para han post-harvest ngan iba pa nga operasyon ha pagproseso hin humay.
Ginlalaoman nga makakabulig an pasilidad agud maibanan an post-harvest losses, pagpaubos han gasto ha transportasyon, ngan pagpauswag han market access han mga parag-uma ngan gudti nga rice traders ha Barugo ngan mga kahigrani nga bungto.
Subay kan Cuta Multipurpose Cooperative Chief Executive Officer Inocentes Aruta dako an naibulig han RPC ha pagsaka han presyo han pamalit hin palay ha Barugo ngan mga kahigrani nga lugar.
Sigun naman ni DA Regional Executive Director Rodel Macapañas, importante an papel han kooperatiba ha pagpauswag han kita han mga parag-uma ngan pagproteher ha ira tikang ha diri patas nga trading practices ngan manipulasyon ha presyo. Gin-aghat liwat niya an kooperatiba nga bumulig agud masiguro an food stabilization ha rehiyon.
Source: RMN Tacloban