Sobra 13,000 nga mga parag-uma ngan parapangisda ha bug-os nga Sinirangan Bisayas an nakakarawat hin Php 2,325 nga pinansyal nga ayuda ha ilarum han Presidential Assistance for Farmers and Fisherfolk Program (PAFFP), kasunod han pagpagawas hin sobra ₱30 milyones nga cash aid tikang han Hunyo 8 ngadto ha Hunyo 11, ha dirudilain nga munisipalidad ha rehiyon.
An distribusyon in humagos ha mga bungto han La Paz, MacArthur, Julita, Dagami, Burauen, Isabel, Palompon, Merida, Kananga ha Leyte, ngan ha Mapanas, Palapag, Gamay, ngan Lapinig ha Northern Samar, nga umabot ha mga yukot yukot nga mga benipisyaryo nga padayon naaapektaran an panginabuhi tungod han pag umento han mga parapliton ngan mga pag-ipit ha ekonomiya ha sektor han agrikultura ngan pangisda.
An kwalipikado nga mga benepisyaryo amo an mga parag-uma ngan mga parapangisda nga nakarehistro ha ilarum han Registry System for Basic Sectors in Agriculture (RSBSA) nga aktibo nga nag-uuma o nangingisda ha butnga han krisis ha lana tungod han geopolitical tension ha Middle East.
Source: #RMNTaclobanNews