Sapit la an iya motorsiklo, patay na han madiskobre an lawas han usa nga lalaki ha kabutngaan han kalsada ha Brgy Lonoy, Maasin City, Southern Leyte, kanina han banda alas 5:30 han aga, Mayo 1, 2026.
Ginkilala an biktima nga hi alyas “Noy,” 34-anyos, residente han Brgy. Canyuom, Maasin City, Southern Leyte.
Ha impormasyon nga nakuha, waray na ini kinabuhi han makit-an nga nakahigda ha butnga han kalsada, sapit han motorsiklo hini. Naabtan ini nga mayada dako nga samad ha wala nga parte han iya nawong.
Nagawas ha inisyal nga imbestigasyon han mga otoridad nga banda ala 1:00 han kaagahon antis an insidente, nag atindir an biktima hin usa nga disco ha gymnasium han Brgy. Lonoy. Ha kabutngaan han disco, usa nga diri pagkaarasya an nahitabo ha butnga han biktima ngan han usa nga ginkilala nga hi “Natoy,” residente han mao nga barangay, pero dagmit naman liwat nga napakalma han mga opisyal han barangay.
Banda alas 5:00 han aga han pareho nga adlaw, umuli an biktima sakay an iya motorsiklo. Ha pamahayag han pipira nga residente hirani ha lugar han insidente, makusog nga tunog hin pagbunggo hin motorsiklo an ira nabatian.
Nag-request naman an Maasin City Police Station hin doctor ha pagbuhat hin post-mortem examination ha biktima agud madeterminar an kawsa han kamatay hini.
Source: RMN Tacloban