Patay an usa nga nurse han Department of Health matapos madat-ugan hin concrete slab ha Sierra Island, Brgy. Canhawan Gote, Catbalogan City, Samar, kulop han Agosto 27, 2026.
Ginkilala an biktima nga hi alyas “Kel,” 35 anyos, waray asawa ngan residente han Brgy. Canlapwas, Catbalogan City nga nakaassign ha Catbalogan City Health Office.
Kaupod niya ha pagdumara hin Measles-Rubella Supplemental Immunization Activity ha Brgy. Canhawan Gote hi alyas “Jeff,” 42 anyos, nga usa gihapon nga nurse han City Health Office.
Nahisabotan mga mahuman an ira aktibidad, kinadto hira ha docking area han mga motorboat basi maghulat han ira masasakyan pabalik ha Catbalogan City.
Samtang nalingkod hi “Kel” ha ilarom han waiting shed, tigda nga narusdak an pira nga parte han estruktura ngan madat-ugan hiya han concrete slab.
Nagantos hin grabe nga kasamdan ha lawas an biktima.
Ginbuligan dayun hiya ni “Jeff,” kaupod an pipira nga residente ngan mga daycare teacher nga nakada ha lugar, ha pagkuha ha iya tikang ha ilarom han nahulog nga simento.
Gindara hiya ha Samar Provincial Hospital basi matambal pero igin-deklarar hiya nga Dead on Arrival.
Nagpapadayon an imbestigasyon han Catbalogan City Police Station basi mahibaroan an hinungdan han karusdak han concrete slab ngan an iba pa nga detalye han insidente.
Ginhangyo liwat han kapulisan an pamilya han biktima nga igpailarom ha pa-post-mortem examination an lawas hini.
Source: #RMNTaclobanNews