Dead on arrival ha hospital an usa nga lalaki mahuman madabi an ginmamanehuan nga motorsiklo han aksidente hini nga igkabungguay an usa nga kotse ha Maharlika Highway, Brgy. Silanga, Catbalogan City, banda alas 11:10 han aga, yana nga adlaw, August 14, 2026.
An motorsiklo in ginmamanehuan ni alyas “Randy,” 53-anyos nga businessman, inasaw-an, ngan residente han Brgy. Tizon, Tarangnan, Samar.
An kotse liwat in ginmamanehuan ni alyas “Omar,” 26-anyos, inasaw-an, ngan residente han Papandayan Caniogan, Marawi City, Lanao Del Sur
Ha inisyal nga imbestigasyon han mga otoridad, byahe an motorsikto tikang ha Brgy. Tizon, Tarangnan pakadto ha Catbalogan City Proper, samtang byahe liwat an kotse tikang ha Marawi City, Lanao del Sur, pakadto ha Metro Manila.
Ha pag abot ha lugar han insidente, gin aaligar nga ginsakop han kotse an right of way han katugbang nga linya, ngan bumunggo ha tiarabot nga motorsiklo.
Nadara pa an drayber han motorisklo ha Samar Provincial Hospital pero gindeklarar ini nga dead on arrival. Samtang, nag antos naman hin minor injuries an drayber han kotse.
Pareho nga gindara an mga dabi nga sarakyan ha Catbalogan City Police Station para han sakto nga disposisyon.
Source: RMN Tacloban