Boluntaryo nga nagsurender ha mga otoridad an usa nga miyembro hin Communist Terrorist Group (CTG) ha Brgy. Bulacan, Hindang, Leyte, kakulop, Pebrero 19, 2026.
Ini in mahuman an malinampuson nga negosasyon pinaagi han pinag-usa nga pwersa han 1st Leyte Provincial Mobile Force Company, Baybay City Police Station (CPS), Provincial Intelligence Unit -Leyte Police Provincial Office (PIU-LPPO), CIT-Ormoc, Regional Intelligence Unit 8, ngan Hindang Municipal Police Station.
Ginkilala an surender nga hi alyas “Tiyo,” 61 anyos nga parag-uma, ngan residente han Kananga, Leyte, nga dati nagbubuhat hin operasyon ha mga mabukid nga lugar han ikatulo ngan ika-upat nga distrito han Leyte.
Hapagkayana, ada na ha kustodiya han 1st LPMFC an anay rebelde para han kaangayan nga dokumentasyon, debriefing, ngan assessment. Gin aandam na gihapon an mga dokumento para han iya pag-api ha Enhanced Comprehensive Local Integration Program (E-CLIP) han gobyerno agud mapadangat ha iya an mga benepisyo nga makakabulig ha iya hapsay nga reintegrasyon ha sosyedad.
Source: #RMNTaclobanNews