Ginsiguro han Department of Budget and Management (DBM) nga an mga teachers an pinaka makakakapahimul-us ha haros P1 trilyon nga budget han Department of Education (DepEd) ha 2027.
Sumala ha DBM, sulod han ginproproner nga P975 billion nga budget han DepEd an mas dako nga pondo para ha sweldo, benepisyo, career progression, ngan iba pa nga suporta para ha mga teachers.
Lakip dinhi an ika-upat nga trance han salary increase ha ilarom han Executive Order No. 64, nga katugbang han average han haros lima ka porsyento nga dugang ha binulan nga sweldo han mga empleyado han gobyerno.
Labot la hini, mayada sobra P38 billion gihapon nga nakaalutaga para ha mga benepisyo lakip an Personnel Economic Relief Allowance, Special Hardship Allowance, teaching overload honoraria, ngan medical allowance.
Magpapabilin gihapon an P10,000 nga tinuig nga teaching allowance para ha sobra usa ka milyon nga mga teachers.
Samtang, P12 billion an gin-alutaga para ha Expanded Career Progression Program nga ginlalauman maghahatag hin higayon nga ma-reclassify an 135,063 positions.
Source: #RMNTaclobanNews