Ginpangunahan ni Lt. Gen. Antonio Nafarrete, Chief sang Philippine Army, ang paghatag sang pagkilala sa mga soldado sang 79th Infantry Battalion nga naka-engkwentro sang ginaalegar mga katapo sang rebelde sa Negros Occidental.
Ginpatigayon ini kadungan sang 52nd Founding Anniversary sang 3rd Infantry Division (3ID) sa Camp Macario Peralta sa Jamindan, Capiz kahapon, Mayo 1.
Lakip sa mga ginkilala amo ang isa ka katapo sang militar nga napilasan sang nag-atubangay sila sang nabilin nga pwersa sang Northern Negros Front sa Barangay Salamanca, Toboso, Negros Occidental sang Abril 19.
Ginpasidunggan man ang isa man ka soldado nga nasamaran man sa separado nga engkwentro sa Barangay Minautok, Calatrava, Negros Occidental sang Abril 6.
Nagapaayo sila subong sa ospital sa sulod sang Camp Peralta.
Suno pa kay Capt. Jessie Jun Ebalan, Chief sang Division Public Affairs sang 3rd Infantry Division, iya ginpahayag nga pareho nga estable na ang kondisyon sang duha ka tropa. Napaidalom naman sa operasyon ang soldado nga napilasan sa Toboso bangud naigu ini sa wala kag tuo nga kamot.
Nahibaluan nga sa founding anniversary sang 3ID, ginselebrar ang ila mga kadalag-an lakip na ang engkwentro sa Toboso nga ginkamatay sang 19 ka mga ginapahayag katapo sang rebelde.
Nauna na nga ginbali sang CPP ang pahayag sang militar nga lunsay NPA members ang napatay, apang padayon nga ginapanindugan sang Armed Forces of the Philippines nga mga armado nga rebelde ang 19 nga ila naatubang.
Sa mensahe pa ni Nafarrete, ginpahayag sini nga ang ila pagtipon sa 3ID indi lamang limitado sa komemorasyon kundi pagkilala sa ila nga mga kaayuhan lakip na ang padayon nga pagpanikasog sa pag-mentenar sang kalinong kag seguridad sa Panay kag sa Negros Island.
Source: Bombo Radyo Iloilo