Gipasiugda sa mga foreign ug trade ministers sa ASEAN ang panginahanglan sa usa ka hiniusang tubag sa rehiyon batok sa nagkagrabeng kagubot sa Middle East, samtang nagpasidaan sila sa posible nga epekto niini sa energy security, suplay sa pagkaon, patigayon, ug kaluwasan sa mga ASEAN nationals nga nagtrabaho sa gawas sa nasud.
Nahisgutan kini atol sa ASEAN Joint Foreign and Economic Ministers’ Meeting nga gipahigayon sa Sugbo niadtong Mayo 7, 2026 isip kabahin sa ika-48 nga ASEAN Leaders’ Summit, diin gipangulohan sa mga kalihim sa foreign affairs ug trade sa Pilipinas ang maong tigom.
Sa maong meeting, nanawagan si Foreign Affairs Secretary Ma. Theresa Lazaro sa tanang partido nga nalambigit sa kagubot sa Middle East nga isalikway ang gubat ug pilion ang malinawon nga negosasyon aron masulbad ang ilang mga kalainan.
Matod ni Lazaro, nagtigom ang mga lider sa 11 ka miyembrong nasud sa ASEAN sa Pilipinas aron hisgutan ang hiniusang mga solusyon sa labing nag-unang mga hagit sa rehiyon, ilabina sa energy security, food security, patigayon, ug proteksyon sa mga ASEAN nationals nga naapektuhan sa padayong tensiyon sa Middle East.
“Uban niini, gilauman nato nga makapagawas ang summit og usa ka ASEAN leaders’ statement isip tubag sa krisis sa Middle East, usa ka pahayag nga magpakita dili lamang sa atong panaghiusa kondili usab sa pundasyon sa atong pagtubag sa umaabot nga mga krisis,” matod ni Sec. Lazaro.
Sa laing bahin, miingon si Trade Secretary Maria Cristina Aldeguer-Roque nga tukma kaayo ang pagpatigom sa joint ministers’ meeting tungod kay ang mga hagit nga giatubang sa rehiyon dili lamang mahimutang sa foreign policy o economic policy.
Matod niya, ang mga isyu sama sa energy security, paglihok sa patigayon, ug kalig-on sa supply chain direktang naapektuhan dili lamang sa mga desisyong ekonomikanhon kondili usab sa mga geopolitical developments sa lain-laing bahin sa kalibutan.
Ang maong panaghiusa sa Sugbo nagpakita sa determinasyon sa ASEAN nga magtinabangay aron maprotektahan ang ekonomiya, seguridad, ug kaayohan sa katawhan batok sa mga global nga krisis nga mahimong makaapekto sa rehiyon.