Nagbisita ang mga miyembro sang Negros Occidental Police Provincial Office (NOcPPO) sa lamay sang yumaong PMSg Fernando P. Marfa Jr., kun sa diin ginpatigayon ang pagkilala paagi sa Reading and Awarding sang Medalya ng Kadakilaan bilang posthumous award nga pagpasidungog sa iya serbisyo kag sakripisyo.
Sa pagpangulo ni PCOL DENNIS C. WENCESLAO, Provincial Director, kag sa direkta nga pagdumala ni PBGEN ROMANO V. CARDIÑO, Regional Director sang PRO-NIR, ginpakita sang NOcPPO nga ang serbisyo kag sakripisyo sang mga police personnel ginahatagan sang mataas nga bili. Upod sa pagbisita sanday PLTCOL TERRENCE PAUL ST. ANA C., PARMU, kag PEMS DANIEL NAGPATON, PESPO.
Ang Medalya ng Kadakilaan nga ginhatag kay PMSg Marfa Jr. isa ka simbolo sang kaisog, katutom, kag pagkamatinumanon sa iya panumpa sa serbisyo. Ini nagapakita sang pagrespeto sang PNP sa isa ka personnel nga naghalad sang iya kabuhi sa pagtuman sang iya katungdanan.
Nagpahayag ang mga opisyal sang ila sinsero nga pagpakigbahin kag ginpasiguro ang padayon nga suporta sang organisasyon sa pamilya sang napatay nga police officer. Bilang pagpakita sang simpatiya kag pakighiusa sa pamilya, naghatag man si PCOL Wenceslao, bilang representante ni PBGEN Cardiño, sang pinansyal nga bulig.
Ang amo nga inisyatibo nagapakita nga ang responsibilidad sang PNP indi lamang ang pagprotektar sa katawhan, kundi pati ang pag-atipan kag pagpalig-on sa mga pamilya sang mga personnel nga naghatag sang ila kabuhi sa serbisyo
Ang pagkilala kay PMSg Marfa Jr. isa ka pahinumdom sa tanan nga ang tinuod nga serbisyo may kaupod nga kaisog, pag-antus, kag pagsakripisyo.
Ang iya kaisug kag dedikasyon mangin inspirasyon sa iya mga kaupdanan kag sa tanan nga miyembro sa serbisyo nga magpadayon sa pagtuman sang ila katungdanan nga may integridad, disiplina, kag dedikasyon.