Nagdoble an ginkaatubang nga kaso han usa nga lalaki mahuman ini makuhaan hin gin aaligar shabu durante han ginbuhat nga warrant service operation han mga otoridad ha Brgy. Central, Hilongos, Leyte, aga han Hunyo 16 , 2026.
An naaresto nga suspek in ginkilala ha alyas nga “Dodong,” 42-anyos, waray trabaho, ngan residente han Brgy. Central, Hilongos, Leyte. Hiya in inisiyal nga naaresto ha bisa hin Warrant of Arrest ha kaso nga Frustrated Murder, nga mayada rekomendado nga pyansa nga P200,000.
Ha ginbuhat nga lawful search incidental to arrest, narekober han mga personales an 101 kapakete hin gin aaligar shabu nga nagkakantidad hin purluminos ₱377,304.80 nga nakatago ha usa nga pouch, mentos container, brown paper pack, ngan mga drug paraphernalia.
Mahuman madiskobre an ilegal nga droga, dayon ginpasabot ha suspek an pag aresto ha iya ha pagtlapas han Section 11, Article II of Republic Act No. 9165 (Possession of Dangerous Drugs), sugad man han iya mga konstitusyonal nga katungod, ha yinaknan nga iya nasasabtan.
Hapsay naman nga ginbuhat an pagmarka, imbentaryo, dokumentasyon, ngan pagtimbang han ebidensya ha lugar han pag aresto, ha atubangan han mga ginkikinahanglan nga testigo, ha mandato han balaud. Igpapasa an mga narekober nga ebidensya ha Regional Forensic Unit 8 para han laboratory examination.
Yana nakapailarom an suspek ha kustodiya han Hilongos MPS pending inquest tungod han pagtalapas han Section 11, Article II han RA 9165, samtang an return of warrant proceedings for Frustrated Murder in sugad man in ig-aandam para igsumiter ha issuing court.
Source: RMN Tacloban