Arestado ang isa ka 20-anyos nga lalaki matapos madakpan sa buy-bust operation sang Bacolod Police Station 3 sa Purok Langis, Barangay Banago, Bacolod City sang Agosto 1 matapos makabaton ang mga kapulisan sang pila ka reklamo nagikan sa mga kaingod balay sang subject person.
Narekober sa suspetsado ang 35 grams sang suspected shabu nga nagabalor sang ginabanta P238,000, lakip ang 21 ka heat-sealed transparent plastic sachets kag ang buy-bust item.
Sa interview sang Bombo Radyo Bacolod kay Police Lieutenant Benjo Ballo-Allo, Officer-in-Charge sang Bacolod Police Station 3, ginpahayag sini nga first offender ang suspek kag wala sa listahan sang Barangay Anti-Drug Abuse Council (BADAC) kag ginakabig nga Street Level Individual.
Natalana nga mapasakaan sang kaso ang suspetsado subong nga adlaw sa paglapas sa Republic Act 9165 ukon Comprehensive Dangerous Drugs Act of 2002.
Source: Bombo Radyo Bacolod