Padayon yana nga ginbibiniling han mga otoridad an lawas han usa nga lalaki nga gin-aaligar lumayog ha San Juanico Bridge alas 5:41 han aga yana nga adlaw, Septiyembre 13.
Ha impormasyon nga nakuha tikang ha kapulisan, hinkit-an han mga tinaglawas han RMFB8 805th Company an lalaki samtang hira nagbabantay ha tulay, diin ini gin-aaligar nahulog o lumayog tikang ha nasabi nga lugar.
Ginsumat dayon an insidente ngadto ha Police Station 3 ngan ha ira pagresponde, napamatud-an nga may-ada nahitabo nga insidente.
Ginkoordinar han kapulisan an Philippine Coast Guard, PNP Maritime Group, ngan Bureau of Fire Protection agud magbuhat hin search and retrieval operation.
Naghatag liwat hin medikal nga standby an BFP medical team ngan TACRU.
Nakig-sumpayan liwat an Police Station 3 ha mga opisyal ngan tanod han Barangay 97 Cabalawan, Tacloban City, para ha padayon nga pagbiling ha baybayon ngan coastal road han lugar.
Samtang sinusurat ini nga balita, waray pa makit-i an lalaki ngan padayon pa an ginbubuhat nga operasyon han mga otoridad.
Source: RMN Tacloban