Arestado han mga otoridad an usa nga lalaki mahuman makuhaan hin gin-aaligar shabu ha ginbuhat nga buy-bust operation ha Brgy. Holy Child I, Alangalang, Leyte, alas-10:30 han gab-i han Hunyo 30.
Ginkilala an suspek ha alyas nga “Kardo,” legal nga pangidaron, waray trabaho, ngan residente han Brgy. Holy Child I, Alangalang, Leyte. Ginkaklasipikar hiya han kapulisan nga Street-Level Individual (SLI).
Narekober tikang ha suspek an upat (4) nga kapakete hin gin-aaligar shabu nga may ginbabana-bana nga bug-at nga 2.18 grams ngan Dangerous Drugs Board (DDB) value nga Php14,824.00. Nakuha liwat an ginamit nga buy-bust money, coin purse, upat (4) nga improvised tooter, usa (1) nga rolyo hin aluminum foil, upat (4) nga lighter, ngan usa (1) nga bugkos hin mga waray sulod nga plastic sachet.
Ginbuhat an pagmarka, pag-imbentaryo, ngan pagkuha hin litrato han mga narekober nga ebidensya ha lugar han operasyon, ha atubangan han mga ginkikinahanglan nga testigo subay han balaud. Igpapadara an mga narekober nga gin-aaligar ilegal nga droga ha Regional Forensic Unit 8 para han laboratory examination.
Samtang, aada yana ha kustodiya han Alangalang Municipal Police Station an suspek para han pagpasaka han kaso may kalabutan ha pagtalapas han Section 5 (Sale of Dangerous Drugs) ngan Section 11 (Possession of Dangerous Drugs), Article II han Republic Act No. 9165 o Comprehensive Dangerous Drugs Act of 2002.
Source: RMN Tacloban