Isang graduate ng Cebu Doctors’ University ang nanguna sa Pharmacist Licensure Exam na ginanap noong Abril 10 hanggang 11, 2023.
Inilabas ng Professional Regulation Commission noong Biyernes, Abril 14, ang kumpletong listahan ng mga pumasa at si Lyndale Gallardo ay nangunguna sa rank na may 93.55 porsiyentong rating.
Sinabi ni Gallardo na hindi sumagi sa kanyang isip ang pag-topping the board habang naghahanda. Sinabi niya na ang kanyang pangunahing layunin ay makapasa sa pagsusulit at maging isang lisensiyadong parmasyutiko.
“Nilinaw ko sa aking sarili na hinding-hindi ako magiging kampante at dapat kong ibigay ang 110 porsiyento ng aking pagsisikap upang makapasa sa pagsusulit. Kahit na bumagsak ako, alam kong matututo ako sa karanasan at subukang muli sa susunod. Pumasa o fail, winner ako. Board placer man o hindi, winner ako,” sabi ni Gallardo.
Alam niyang kailangan niyang ibigay ang lahat, ngunit hindi niya hahayaang madiktahan base sa magiging resulta.
“I felt a sense of impending doom during the days leading up to the boards. Naramdaman ko ang pagkabalisa at takot gaya ng mararamdaman ng sinumang kumukuha ng board exam. May ilang araw na hindi ako nakapag-review nang epektibo dahil dito,” pagbabahagi ni Gallardo.
Pinayuhan niya ang mga kumukuha ng pagsusulit na magkaroon ng sapat na tulog habang nagre-review, na huwag pilitin ang kanilang sarili na isaulo ang lahat ng impormasyon tungkol sa mga gamot at maging interesado at pahalagahan ang bawat module.
May kabuuang 1,420 sa 2,275 ang pumasa sa pagsusulit na ibinigay ng Board of Pharmacy sa iba’t ibang lungsod sa buong bansa na kinabibilangan ng Cebu.
Ang Southwestern University PHINMA ay pang-anim sa mga nangungunang paaralan na may rating na 80.49 porsyento.
Inialay ni Gallardo ang kanyang tagumpay sa Diyos, sa kanyang pamilya, mga kaibigan, guro at kawani ng CDU, at lahat ng kasangkot sa kanyang paglalakbay upang maging isang lisensiyadong parmasyutiko.