Nag antos hin kasamdan ha lawas an duha nga motorista ngan an tagsa tagsa mga sakay hini mahuman aksidente magbungguay an ginsasakyan nga mga motorsiklo ha Brgy. Balilit, Dagami, Leyte, kanina han alas 12:18 han maagahon, June 4, 2026.
An usa nga motorsiklo (Motorstar) in ginmamanehuan ni “Amir,” 59-anyos nga laborer, ngan sakay hini an back rider nga hi “Jose,” 46-anyos nga construction worker, inasaw-an, pareho mga residente han Dagami, Leyte.
Samtang, an usa pa nga motorsiklo in ginmamanehuan liwat ni “Carlo,” 37-anyos nga barangay official, sakay hi “Emerson,” 24-anyos nga canteen helper, pareho mga residente han Dagami, Leyte.
Ha inisyal nga imbestigasyon han mga otoridad, nabyahe an motorsiklo nga ginmamaneho ni “Amir” tikang ha Brgy. Balilit, Dagami, pakadto ha Brgy. Tin-ao, Dagami, samtang byahe naman an motorsiklo ni “Carlo” ha katugbang nga direksyon. Ha pag abot ha lugar han insidente, gin aaligar nga nagkamayada guba an headlight ni “Amir”, nawarayan hin kontrol ngan nangadto ha katugbang nga lane.
Ginproyba ni “Carlo” nga malikyan an tiabot nga motorsiklo ni “Amir” pinaagi hin pagmaniobra tipahirayo ha iya gin-aagian, pero tigda nga bumalik hi “Amir” ha iya sakto nga linya ngan bumangga ha tuo nga bahin ni “Carlo”, ngan nagresulta hin pagkahulog ha ira upod an ira mga sakay ha kalsada ngan nag angkon hin kasamdan.
Gindara hi “Amir” ngan an backrider hini ha Leyte Provincial Hospital ha Palo, Leyte, samtang gindara naman hi “Carlo” ngan an sakay hini ha Eastern Visayas Medical Center (EVMC) ha Tacloban City para han kadagmitan nga pagtambal.
Gindara liwat an mga dabi nga motorsiklo ha Barangay Hall han Brgy. Balilit ngan ginpailarom ha kustodiya han mga opisyales han barangay para han safekeeping.
Source: RMN Tacloban